ذياب گزار – المقلب (ابو سرحان)
ولد في البصرة 1946 و في 1982 غيب ولم يعثر عليه الى يومنا هذا
نصوص
*** *** ***
يبنادم
ابهيده إعله بختك لا تعت بيهه
روحي أنحلت والشوگ ماذيهه
ما چنهه ذيچ الروح
ولا چنهه كلهه جروح
والشوگ ماذيهه … اشمالك تعت بيهه
تسيورة عمري وياك
غفله واخذني الطيف
ولنها بحلاة النوم
روحي أعله روحك ضيف
وأغفه بهواك سنين
كيّفْ تراني بكيف
وراگد بروحي الماي
ثاريهه غيمة صيف
بچي الشموع الروح
بس دمع مامش صوت
ورفّة جنح مكسور
گلبي يرفّ بسكوت
لا هي سنه وسنتين
لا هي صحوة موت
حسبة عمر عطشان
والماي حدره يفوت
*** *** ***
شدات الورد
مهضومه شدات الورد ياحمرة الشفه
شدن چفافيچن حسن لو مرت الزفه
ليل وگمر ونجوم
والهيل مامفطوم
والروح ماتحمل ثگل ترفه
مهضومه شدات الورد ياحمرة الشفه
آه شكثر هم الگلب شو هلهلن بهداي
موش العلى جفوني كحل هذا سواد الماي
سيست مابين الحزن والفرح يادنياي
خلني يابنيات
فوگ الزلف ماشات
والروح ماتحمل ثقل ترفه
مهضومه شدات الورد ياحمرة الشفه
هيچي سوالفنا انست والحب تنكرينه
رديلي ياحلوه الوفه وطيبة محاچينه
وعيوني ماتحمل سهر والگلب شيعينه
بسمة حلم چذاب
وصواب فوگ صواب
والروح ماتحمل ثگل ترفه
مهضومه شدات الورد ياحمرة الشفه
*** *** ***
شوگ الحمام
حسنچ گمر لو شمس لو فرحة لو زفه
خليني حدر الزلف ترجيه ارد اغفه
يالماي وين النبع مدفون بالشفه
شوگ الحمام بهيد والونه الترفه
يالرمشه بستة فرح وعيونه تجليبه
يالطوله ناي العشگ والشعر مادريبه
مچتول من صيد امس من كثر تعذيبه
ذبلن وعود العشگ بشفافك وماتن
وطيور حبنه ارحلن وي طيفك وتاهن
كل المهاجر اجه گلبك بعد ماحن
*** *** ***
وين يالمحبوب
وين المحبوب .. وين گلبي يلوب .. وتتحمل ذنوب
وين رايح وين
والمن ادير العين
شلك عليه
راح العمر وانگظه ريشه على جاري الماي
ياخذها مد وجزر مابين رايح جاي
لا وچه ليلة بطيف
ولا ضاگ فرحة كيف
ولا وهن بيه … شلك عليه
الحب جرح بالگلب كل لحظه احسن بيه
مرافگني طول العمر كل مايطيب اچويه
وتباها بيه جروح
اضحك وشيم الروح
والبيه بيه … شلك عليه
*** *** ***
كرستال
مره مرني الطيف نسمه اعله الجنح
وبلل عيوني بدمعتين الصبح
ونگط بهيده اعله روحي الغافيه
سوالف عرس
وچانت الگذله ذهب
وجانت الدنيا كرستال وشمس
مره مرني الطيف والنومه ثجيله
وشاورتني وشفتك هلال ابو ليله
وانه وصيته وعدني
وگالي ارجعلك سوه
وچانت الگذله ذهب
وجانت الدنيا كرستال وضوه
مره مرني الطيف مهره مزلفه
وذب غطوته البارده گليبي ودفه
وطرزت للجاي ورده من الفرح
وچانت الگذله ذهب
وچانت الدنيا كرستال وقزح
مره مرني الطيف وابثوبي الجديد
وخضر بروحي گمر وهلال عيد
وانه وصيته عالباچر مثل امس
وچانت الگذله ذهب
وچانت الدنيا كرستال وشمس
*** *** ***
الگنطرة بعيده
حدر التراجي برد … والگنطره ابعيده
وأمشي وأگول وصلت … والگنطره ابعيده
ونگضني مشي الدرب
والشوگ هز الگلب
والگنطره ابعيده
حلمانه برد الصبح رجَّف خلاخيلي
يا دفو كمّل دفو يا گمر ضوّيلي
ويا ذهب خيط الشمس طوقين سويلي
لايگلي طوگ الذهب والدغش ما ريده
وأمشي وأگول وصلت والگنطره ابعيده
لا لا يبرد الصبح ما تحمل اجفوفي
ازغيره وچواني العشگ وأتوسّد إزلوفي
هيمه وجحيل الوكت ما لمني نفنوفي
لوذي إعله بعد البعد يا روحي حدر ايده
وأمشي وأگول وصلت والگنطره ابعيده
*** *** ***
حاصودة
على لسان فلاحة:
يو هو الحيل الحيل .. يو هو المهر كحيل
يو هو عيونه التربي .. يو هو سجة لدربي
حاصوده وبيدي المنجل
بالك لا تگرب يمي
لا تشكي ولا تتوسل
انه لك يابن عمي
غاد ابعد
خليني احصد
واسمع رنات حجولي
اشرايد
يا حبيب تنشد
بگليبي الشوگ يلولي
متغاوي وعگالك مرعز
وحزامك فضة مرصع
والشوگ احلام تطرز
ياغيم السنبل ريع
*** *** ***
لا لا لول لوّه .. خلخالي صاح ودوه
لا لا لول ليّه .. ترچيتي تضوي عليه
يل راكب مهرة صغيره
يل شايل خنجر عربي
هاي اني بدربك ليره
نزلني بكوشر ربي
لبسني خويط الليلو
وغطيني بريش الگنبر
شربني ماي حليلو
ووكلني نفاش البر
باعوني بحفنة حنطة
ما عدهم اهلي مروه
كتلوني كتل الگرطة
وانطوني لشايب گوه
*** *** ***
خيو بنت الديرة .. خيو حلوة صغيرة
خيو يا ضحكتها .. خيو يا مشيتها
خيو چنها طويرة
خيو عدها گصيبة خيو شگرة طويله
خيو ليرة وتلهث خيو حدر الشيله
خيو ورگات الخس خيو چفوف الترفه
خيو دورة محبس خيو رسم الشفه
خيو ياضحكتها خيو مي وجوري
خيو يا رگبتها خيو چن فرفوري
*** *** ***
شتدري بيه
بيه يل شحيت سوله
وانه مابياش لوله
لو برد جرحي
وانه المالوم
اشگ جرحي اعله طوله
وسولة المالوم سوله
*** *** ***
(مختصر الحياة)
كاروك، هودج نعش والدنيا مگضيه
والعمر شوگ، وألم وأمال ورديه
*** *** ***