دالغة / راسي يوجعني
نحن مجتمعات رأسية،ودخلت للغتنا كلمة جديدة هي تاج الراس
برهان المفتي
………………….
نحن شعوب نحب الرأس، ولا يغيب الرأس عن حواراتنا اليومية وكلامنا اليومي حتى في سوق المخضر.. راس بصل، راس شلغم، ، بل وحتى في بيوت الشيسمونة فأن المعاملة بعدد الرووس وليس بالوقت، لأن الشغلة تطلع خسرانة إذا بالوقت والراس هو القياس الأصح والأدق والضامن للطرفين أو الأطراف كلها.
الأمور في مجتمعاتنا هي كلها بالراس، اللي يخطط نقول عنه ” الشغلة ضربت براسه” وإللي يعاند في كل موقف نقول عنه ” راسه يابس”. نحن مجتمعات رأسية، حتى أن اهتمانا المفرط بالرأس كان نتيجته مجتمعات برؤوس فارغة لأننا نسينا الأطراف وكيفية نقل الأفكار من الدماغ في الراس إلى الأطراف لتنفيذها، فتتحمض الفكرة في الراس وتتحول إلى حامض يذيب الدماغ ويحول الجمجمة إلى رأس فارغ.
ونحن حين نحب ندلل في الحب، وبسبب هذا زدنا الحب درجة وصرنا ندلل الراس ونلبسه تاج، ودخلت للغتنا كلمة جديدة هي تاج الراس، وهي معادل بس بصيغة تهديدية مسلحة صوت وصورة لكلمة كنا بالزمانات نستخدمها وهي (إحترم نفسك)، بس مثل ما تعرفون اللغة تتطور وتاخذ من المجتمع صيغ وتراكيب الجمل، وبدال ما يكون في البلد راس كبير واحد لابس تاج صرنا نمشي ونتعثر برؤوس فارغة ملبسيها تاج، وكل لابس تاج مسوي حوله مطبات صناعية من الخطوط الحمراء حتى أخاف واحد يطمع ويمد إيده يريد يتأكد هذا التاج حقيقي لو شنو.. فكل تاج محمي بخط أحمر حتى يظل تاج الراس بغموضه وقداسته الوهمية.
وحالياً هذه التيجان صارت لها قدرة أن تكبر مع بقاء الراس بحجمه الفارغ العادي، بل صارت للتيجان شراهة كبيرة على إبتلاع أي شي حتى يكبر محيطه، يبتلع الاموال والناس والحقيقة، يبتلع الحاضر والمستقبل ويبصق الماضي.
ولأن التيجان صارت بكل مكان أكو به راس، فنتوقع أن يزداد سعر راس البصل بعد أن يلبسوه تاج ويصير تاج راس بصل، وتاج راس شلغم، وتاج راس الشهر، وتاج راس شيسمونه.
حياتنا تبدي بالراس – راس الولادة – وتضيع بتاج الراس، من نجلس نجلس براس القنفة، ونشرب الشاي من راس القوري، وإذا عدنا طلب عد واحد نغلف طلبنا بورقة ” براس العزيز عندك “، ومن نتصالح نبوس الراس، ومو مهم شنو التصالح ونوع الراس لأن يختلف بحسب المواقف أي ” تطبق الشروط والأحكام”… فشوف لك شروط ميسرة للتصالح حتى لا تتورط بحجم الراس اللي لازم تتعامل وياه.. وبعدين ترى الحساب مثل ما تعرف بعدد الرووس.. ومو كل واحد يتحمل.. بس لا يروح تفكيرك لشيسمونه.. ترى ترى أقصد راس الشارع.. ومثل ما تعرف الدرابين تتداخل ومو سهل نعرف طريقنا ووين راس فرعنا .. أي وراسك.