برهان المفتي
………
قبل أيام صارت شغلة غريبة برياضة مائة متر للسيدات، أكو وحدة صومالية شاركت بهاي الرياضة في بطولة الجامعات في الصين، وطلعت بالمركز الآخير، الشغلة مو هنا ، بس طلعت بالمركز الآخير بفارق عشر ثوان عن الفائزة الأولى، وبرياضة مائة متر كل ثانية تعادل تقريباً عشرة أمتار، وزمن الفائزة الأولى كانت عشر ثوان وخردة، يعني العداءة الصومالية بدت الركض من خلص السباق ! وبالفيديو تظهر هاي الصومالية ما لها علاقة لا بالركض ولا بالرياضة! ها يابه.. لعد شنو!
الصوماليون مو مثلنا يسكتون، لا هم فتحوا تحقيق وگالبين الدنيا تعال يا رئيس الوفد فهمنا شنو السالفة وشنو الموضوع، ودي الليف وجيب الليف طلعت هاي گرايب وزير الرياضة وتريد تزور الصين فماكو غير يكتبوها رياضية ويدزوها بأسم الرياضة والوفد الرياضي للصين وهمين عالبركة خليها تشارك وتركض عن الحلال والحرام، شغلة إنسانية، وتعرفون الأنسانية عد السياسيين فول أوپشن تماما إنسانية أبو الطلعة البهية بفزعة (گعدة الخوات) مال شرطي المرور ببغداد، مو فزع إلهن لأن هنّ بنات نص ردان وبلا أتك لا حاشاه لأن (أبو الطلعة البهية) خوش وليد ما عنده قارش وارش، بس تدرون شغلة إنسانية وهو فوگ ما هو خوش وليد هو همين نائب من نوائب هذا الزمن بالپرلمان يعني هموم الناس من همومه وما ينام قبل ما ينام شيسمونه مالته بعد أداء واجبه الإنساني الليلي مع هذني البنات!
هذا النائب الأنسانية عنده مرتبط بمؤشر الشيسمونه بين رجليناته، مو صوچه صوچ تركيبته جاية هيچ، حاولت أفهم الموضوع منه وبلكي آني همين تصعد عندي الأنسانية بنفس المستوى والطريقة، وتابعت كلامه بس بصراحة صوته من أنواع العذاب في مديرية الأمن، ويقال أن نفس الصوت من أنواع العذاب في جهنم للناس إللي ما يفزعون من يشوفون بنات نص ردان يتعاركن بالشارع وما يسترهن بسيارته المصفحة، د تشوفون الفقه الديمقراطي على أصوله شلون!
أشوكت نتعلم الإنسانية! عشرين سنة يعلمون بينا الأنسانية وما تعلمنا والدليل نشوف إللي سواه (أبو الطلعة البهية) شي غريب، وهو مو غريب بس لأن إحنا وين والإنسانية وين، هاي الإنسانية تجي حزمة وحد (ون پاكيج) وي الديمقراطية المستوردة ومغلفة بورق المحاصصة، ومحدودة التوزيع بس للي عدهم حظ الجلوس على كرسي الپرلمان ومو تحت قبته، لأن إحنا البلد الوحيد إللي قاعة الپرلمان عدنا مثل قاعة سينما، لا قبة ولا عد أصوات باللوحة، رئيس الجلسة يحسب عدد المحابس ويگول صار التصويت !
هسة چم واحد ووحدة مثل العداءة الصومالية بالوفود العراقية؟ وچم واحد ووحدة مثل هاي العداءة صاير سفير لأن هو/هي گرايب راس چبير بالكتلة الفلانية! صحيح أكو سفراء مهنيين تدرجوا في سلك الدبلوماسية، بس هذولة كلش قليلين، بينما السفراء مال أخو المرة لو عديل صماخ چبير هم الأكثرية في السفراء العراقيين وتشوفون الفضايح من سفير يستقبل وفد رسمي وهو لابس نعال لو سفير ينزل للوبي الفندق وهو لابس ملابس النوم النوم ويگولون ملابس نوم مال السيد السفير كانت خفيفة ويراري لأن الجو كلش حار بالبلد إللي هو سفير هناك، لو الوفود إللي تشارك بمؤتمرات عالمية وما تعرف شنو الموضوع، وأول ما يوصلون يسألون عن المولات لو عن الملاهي ويوافقون على كل قرار بدون ما يقرون ويعرفون شنو السالفة، وتالي نسمع حس العياط من تصير ألتزامات قانونية دولية لأن موقعين على القرار!
وأتمنى ينعرض فيديو العداءة الصومالية على شاشات الپرلمان وعلى تلفزيونات الوزراء بالعراق، خاصة وزارة الخارجية، حتى نقارن نفسنا وي الصومال، وخاصة د نسمع همس أن الدب المسافر على طيارة الخطوط الجوية العراقية هو مال راس چبير، هذا الراس الچبير خطية أنقهر كلش وصعدت الإنسانية عنده لمستويات خطيرة وإلا أشوية ينجلط من عرف شلون أكو دب بالعراق يقضي حياته كله وما يسافر عالطيارة!