دالغة / السينما للجميع
برهان المفتي
……
حالياً العراق أكبر أستوديو للأفلام، أي نوع فلم وسيناريو تريد أكو، ينتجولك فلم جاهز من الممثلين والسيناريو والحوار وحتى مشاهد الأكشن تكون مشاهد حقيقية تنافس مشاهد توم كروز في سلسلة أفلام المهمة المستحيلة، بس عدهم ضعف بالإخراج بسبب أختلاف الرؤى الأخراجية بين المدرسة الواقعية ومدرسة الخيال ومدرسة الأفلام الهندية ومدرسة أفلام المافيا ومدرسة أفلام السباكيتي، هاي الاختلافات تؤثر على جودة هاي الأفلام رغم ضخامة الأنتاج ووجود ممثلين بارعين، وللعلم حتى الموسيقى التصويرية بأستوديوهات العراق هي موسيقى ماكو مثلها بأي أستوديو آخر، موسيقى أدواتها الناس وآهاتهم وحسراتهم.
والشي المدهش هسة أن الكل مشارك بهاي الأفلام، يعني السينما صارت هناك ثقافة مجتمع، الكل يحچي سينما، السينما للجميع، ياهو تساله يجاوبك صايرين سينما، لو يگول لك هذا فلم، وإذا عنده وكت راح يگول منو المؤلف ومنو المنتج والممثلين بأدوار البطولة والثانويين، بس محد يخبرك منو المخرج لأن الأخراج شي يخزي، ومع ذلك الكل يدعي من يشوف أي فلم أن هو يفتهم أكثر من المخرج إللي أخرج هذا الفلم، ويناقش الهفوات مال الأخراج والچفصات.
تگعد بأي گهوة راسك ينترس سيناريوهات، تفتح أي قناة تلفزيونية أو فضائية عراقية تشوف أفلام وبطولات لا گريندايزر ولا سازوكي گدر يسويها، أي وزير يطلع بالشاشة تحس د تشوف فلم عن باربا الشاطر في سلسلة أفلام ما تنتهي أسمها ( الشط مرگ والزور خواشيك) وهي سلسلة مشتركة بين الجميع.
بس أقوى أنتاج أستوديوهات العراق من الأفلام والسيناريوهات هي أفلام الأكشن، هاي الممثلين حتى فاندام وأرنولد يحسدوهم عليها وعلى هاي الأمكانيات المتوفرة إلهم، خاصة مع كومبارس من العشائر والعصابات المسلحة يتحركون بحسب السيناريو بدون أي أعتراض، وهذول ما يقبلون إلا بمشاهد حقيقية وأسلوبهم المبالغة، يعني إذا السيناريو يگول طلقة هم يرمون صاروخ، ولا تسأل منين الصاروخ لأن السينما هناك بميزانية مفتوحة لها كل مستودعات الجيش وخزاين البنوك وحتى الحدود مفتوحة، وإذا السيناريو مكتوب واحد ينجرح هذولة يحولوها إلى مقبرة.
كل جهة عدها أسلوبها في كتابة السيناريو وكل جهة عدها ممثلين، بس الكل متفقين على التفاصيل، تماما مثل حلبة المصارعة الحرة الأستعراضية إللي كل مصارع يتفق مع الثاني على تفصيلة كل حركة ومنين راح يمسك المقابل وشنو نوع الصرخات والصياح والحركات إللي يسويها حتى الجمهور يتفاعل وكل مرة يدفعون فلوس يجون يتفرجون مع العلم يعرفون كلها كلاوات وچذب.. بس هاي هي يروحون يصدگون بالچذب أحسن من واحد يحاول يقنعهم باللي يشوفوه حقيقة، هي هاي حرية القرار، يعني لا تعب روحك تقنعني بكلاواتك، ترى آني همين كلاوچي مثلك بس راح أشوف كلاواتك بأختياري مثل ما أنت راح تشوف كلاواتي بأختياري، ترى كلنا ممثلين بهاي الأفلام.. وأهلا بالسينما للجميع.