برهان المفتي
………..
أحلى شي بالفيسبوك هي شغلة البلوك، دوسة وحدة وإللي يزعجك بعد أبد ما تشوفه ولا يتقرب منك، بدون لا هوسة ولا فصل عشائري ولا قنوات فضائية ولا حتى ما اعرف شنو.. الشغلة بينك وبين إللي تضربه بلوك حتى ما يگدر يجيك ويسالك ليش ما ليش.. وطبعاً للمتبحرين بالفيسبوك حتى البلوك درجات مثل العافية.. يعني أكو يتابعك بس أنت مسويله بلوك من التعليق لأن واحد يچفص هواية، وأكو موجود بصفحتك بس أنت مسوي له بلوك من الماسنجر لأن كلش يلح ويدخل بدون أستئذان ولا عنده نهار ولا ليل ولا فرق التوقيت ويدمرك يوم الجمعة من الدقيقة الأولى لغاية الدقيقة الآخيرة بالتبريكات وأدعية النصر المؤزر.
والفيسبوك منتشر بالعراق بشكل كلش هواية بس ما أعرف ليش ثقافة وممارسات الفيسبوك ما موجودة بالمجتمع العراقي بين الناس لا أنترنت ولا موبايل. يعني ليش إللي يچذب على الناخب العراقي بالوعود ما نسويله بلوك وننزله من القوة والقدر بحسب المصطلح العسكري من چنا نلغي الواحد من تعداد الوحدة العسكرية. وليش ننطي لواحد مجال ياخذ راحته بالكذب مثل أبو تصدير الكهرباء تالي صرنا فشلة گدام العالم لأن طلعت الكهرباء ما تتصدر بالسطولة ولازم بالأول نجففها ونطحنها مثل الپاودر ونرش الپاودر على وين محتاجين كهرباء بس إحنا لأن ما عدنا خبرة تصديرية كهربائية رحنا أشترينا سطولة نخليها بيها كهرباء للحبايب بالدول المجاورة وحتى عابرة للبحار إذا واگفين ويانا بخط الثورة والحزب.
أو أبسط من هذا ليش إللي يقشمر الناخب بالوعود ويسويله الشط مرگ والزور خواشيك وتالي تطلع الوعود كلها مثل شعر البنات كلشي ماكو لا طعم ولا شبع وتريد تصور وي أي منجز رأساً يموع مثل ما يموع شعر البنات بالتفلة. هذا لو نطبق عليه سياسة بلوك الفيسبوكية تصير عدنا قابلية كل أربع سنوات نگول باي باي لوجبة من الكذابين الكلاوچية الفاسدين مثل ما واحد يتخلص من أي شي ما يريده لزوال الحاجة أو الأعذار همين مثل المصطلحات العسكرية بالتجنيد (حال تخرجه أو زوال أعذاره).
وبعدين ليش ننطي مجال لواحد ما يسوى فلسين بسوگ البشر يطلع بالتفزيون وياخذ راحته ويگوّم الشيسمونه مالته وأمام ملايين المشاهدين؟ ليش ما عدنا قابلية فيسبوكية تمنعه من الكلام مثل ما نمنع واحد أو وحدة بالفيسبوك من التعليق؟
ليش ماكو لايكات للي يشتغلون بذمة وضمير وهمين نخلي ايموجيات لكل حالة بالتعامل مع أي واحد.. أكو أيموجي كلاوات وأيموجي كذب وأيموجي واحد يضرب دبة لو بوري، وإذا ماكو ممكن نكتب لأخونا مارك يضيف إلنا أي أيموجي نريد وخلي ياخذ الحساب من ميزانية الدولة، هي ظلت على الأيموجي؟ أشو ياهو يجي لزگ له شغلة شخصية وسواها من ميزانية الدولة حتى التضييق والتبييض والتكبير والنفخ وهلس الإبط والعانة وزرع الشعر بالصلعة لو أسنان تبرج بالظلمة.
فيا أيها الفسابكة والمدمنون على الفيسبوك بكرة وعشياً أنقلوا ممارسات الفيسبوك إلى حياتكم ومجتمعكم وخلونا ننطبق البلوك تجاه أي مخادع وفاسد، ونترك أي نوع آخر من المواجهات إللي حارگين گلوبنا واعصابنا بيها، صح تحتاج ممارسة وتعلوم، بس شغلة تستحق وداعتكم، ترى أعصابنا تلفت وصارت تعبانة أكثر من واير المولدة بأي هزة وتطيح، ويجوز نگدر ندز طلب لمارك يدزلنا فريق متخصص يقرا المجتمع العراقي ويسويلنا برنامج بلوكي خاص وخلى المبلوك يگوم يتوسل بينا نرفع عنه البلوك، وإحنا بكيفنا نرفع البلوك لو نشيل بوجهه لافتة مليانة أيموجي… وكل واحد يخلي الإيموجي إللي يناسبه.