برهان المفتي
………….
هاي بالزمانات، من چانت الچفچير بلا زروف، طلعت الناس بفرمان من ديوان الوالي حتى يشوفون هلال العيد، إللي صاعد عالزمال لو صاعد عالتلة حتى بس يرضون الوالي بلكي يفرح بالعيد،
الناس تعبت وماكو هلال، وأكو واحد غبي وخبل بالمدينة ما يعرف اليمنة من اليسرة، دخل بين الناس وسأل شنو الموضوع وليش الناس مخبوصة؟
گالوله الناس تدور على هلال العيد بالسما، چان هذا الغبي الخبل يأشر بيد وگال ذاك هو ، وبالفعل طلع الهلال مثل ما هو أشر..
الناس فرحت والوالي طلع كيس مليان فلوس نطاه هدية للخبل.
الخبل شاف الموضوع خوش رزقة بيه، چان يشير للجهة الثانية من السما وگال ذاك هلال لاخ حتى بلكن يحصل كيس جديد ، چان الوالي يعرف أن هذا لا شاف هلال ولا يعرف شنو الموضوع أصلاً،
فأخذ منه كيس الهدية وأمر بضربه وركبوه عالحمار بالمگلوب والناس ترمي عليه حجارة.. لا هلال ولا فرحة العيد ولا فلوس.
مثل هذا الغبي الخبل موجود بكل مكان وبكل زمان.. يصدگ بروحه من الناس تصفگ له وتحمده بكلمتين، ينتفخ مثل العجينة المليانة خميرة، لدرجة ما يشوف شكو گدامه،
ويدخل بالدور حتى تظل الناس تحمده وتشكره.. فتبدي التخبيصات والچفصات وهو يتصور نفسه ماكو منه لا بالشرق ولا بالغرب، والحقيقة هو حتى مو فاتگ اليمنى ومطلع الخيط من الجلد،
بس من واحد يشرب الدور يسكر ويقفل.
يمعودين بطلوا من الصفگة والهلاهل واللواگة والمديح والمعلقات والهوسات، ترى هذني كلها هوا فاسد ينفخ والنوب ما تفيد گونية كمون،
وحتى لو طلع الهوا بمكرمة فسو ترى الريحة الجايفة راح تخنگنا.. عوفوا هاي الشغلات وخلوها الناس تشتغل بحسب الكتالوگ مو يطلع برة يسمع هوساتكم ومدايحكم.
إللي شاربين الدور عدنا كل يوم يزيدون لأن اللوگية صاروا يعرفون اللعبة، هم نفسهم إللي يصفگون عاليمنة ينتقلون لليسرة ويصفگون هناك همين..
مثل المطيبچية إللي هم چانوا يگعدون بحفلات أم كلثوم حتى يصيحون عظمة على عظمة يا ست (والحقيقة أم كلثوم چانت تدفع لهم كنوع من الدعاية الشخصية)..
هذول هم نفسهم چان عبدالباسط يجيبهم حتى من يقرا يصيحون عظمة على عظمة يا شيخ.. يعني موضوع ذباب اللواگة موضوع قديم مو هسة وي الفيسبوك لو توكتوك لو اليوتيوب.
بكل وكت وزمن أكو لواگة وأكو ناس مدومنة عالراسين مستفادة من اللواگة، وهسة عدنا چم واحد مصدك بروحه عساس هو إللي أضاف الزرف السابع بالچفچير،
وگاعد يشتغل ويخطط لمشروع أضافة اليدة للصمون، حتى من نشيل الصمونة الحارة اللي توها طالعة من الفرن من تنچوي أصابعنا..
لأن أصابعنا كلش مهمة في خدمة الوطن.. بس بكيف اللاعوب شلون يستخدم أصابيعه خاصة الوسطاني الطويل.