برهان المفتي
……….
هذا چان أكو واحد برا-زيلي ما يعرف يلعب طوبة، إي كلش غريبة، وهو من منطقة ودربونة بريو دي جانيرو كلهم سحرة بالطوبة، إللي يلعب بريال لو برشا لو يوڤي، فصارت الناس تعيره شلون برا-زيلي وما تعرف طوبة.
فد يوم گاعد بالگهوة مال نگرية ريو وسمع اللاعب الفلاني عنده خوش وكيل أعمال يسوق له، وهناك ضربت براسه خوش دالغة.. گال لعد خلي أجيب لي واحد يسوّق لي عساس آني خوش لاعب.. وأتفق وي چم واحد نگري ونصاب ياخذوله صور وهو لابس شورت وجيرسي وبين رجليه طوبه، وهو چان طوله حلو وجسمه بدون كرش. وأتفق وي حلاق يسويله گصات مال لاعبين ودگ برگبته تاتو وبيده تاتو مال كأس العالم عساس فاتگ اليم-ني.
سواله خوش فريق تسويقي من النصابين يسوقوله ومصور ياخذ خوش صور بلقطات حتى لو ينام جوة رجليه.. صور بكل فلكة بريو.. وبكل گهوة وسيارة، عساس لاعب فلته، وهناك دز عليه نادي كبير بأوروبا تعال نريدك وندفع لك شي خرافي بس تعال.
صاحبنا ما يعرف الكلّة من الأوت، بس جماعته مضبوطين بكلاوات التسويق جابوله عقد خرافي، گالوله ما عليك، تروح للنادي بأول تمرين تصيح أخ عساس أنصابيت بالرباط الصليبي مال الركبة وهاي تاخذ له سنة حتى تطيب، وما چذب خبر مثل ما گالوله، وجابوا أشعة مزورة من سوگ مريدي مال ريو عساس أربطة الركبة ممزقة.
وگعد سنة وياخذ راتب خرافي وهو ما لاعب شبر. خلصت السنة والموسم، وصار الموسم الثاني، راح لجماعته النصابين تعالوا خلصوني.. گالوله ما عليك.. أول ما تنزل للملعب اتفل بوجه مشجع عساس أستفزك بعبارة عن-صرية لان أنت من غير ملّة .. هم سوا مثل ما گالوله وأتحاد الكرة عاقبه حرمان موسم كامل.. ثاني سنة گاعد ياخذ راتب خرافي وهو ما ضارب ضربة.
الموسم الثالث.. يمعودين هسة شلون.. گالوله ما عليك.. أول ما تدخل للملعب أضرب لاعب برجله، ومن يجيك الحكم ينذرك أدفع الحكم واضربه بوكس بوجه.. طبق الخطة تمام وأنحرم من اللعب سنتين..
أربع سنوات أخذ راتب خرافي وصار مليونير..وحتى يطلع من الورطة بعد أربع سنوات شرب منشطات فألأتحاد الدولي منعه من اللعب مدى الحياة.. وذاك هو عايش بأوروبا مليونير وداير مدايره النصابين اللي يعرفون الفلم ماسكيه من خصاويه !
هسة تعال طبق هاي الكلاوات على حالتنا… راح تشوف عدنا مثل هذا هو وجماعته النصابين والمصورين.. ناس ياخذون رواتب خيالية أربع سنوات وهم كلشي ما يسوون.. وبعد أربع سنوات يطلع أوروبا مليونير وداير مدايره الناس الكلاوچبة مالته بس ماسكين عليه ملفات يهددون بيها وياخذون منه فلوس.
الموضوع كله تسويق.. جيب شركة تسويق وعلاقات عامة.. وأترك الباقي على الكلاوات.. بس المهم ما تتدخل بالشأن العراقي !