دالغة / شكراً للعاصفة
برهان المفتي
………
من كم يوم سقطتْ طائرة هليكوبتر في شمالي العراق على الحدود العراقية التركية، الأخبار گالت سقطتْ بسبب سوء الحالة الجوية والغيوم الرعدية والامطار الشديدة، الناس لگوا بمكان السقوط خمسة جثث بعضهم مسلحين.. الموضوع أن محد يعرف هذولة منو والهليكوبتر لأي جهة. لا سمعنا اللجنة الأمنية بالپرلمان طلعتْ توضح الموضوع، ولا ناطق رسمي، عبالك المنطقة مو مال أحد، هيچ رگعة واگعة من عباءة السماء ومحد يريدها.
كل جهة نفتْ أن الهليكوبتر مالتها، جهات رسمية مثل دول وجهات غير رسمية مثل العصابات والأحزاب المسيطرة على تلك المنطقة، والنوب حتى أبو الأقليم د يفر براسه ما يعرف شنو الفلم، هذولة جثث منو، والهليكوبتر مال منو والطيار منين، ومن وين الهليكوبتر ومن يا مطار. الكل ساكتين لأن أي كلام هو إدانة وفضح أن بعض أمراء الحروب وقادة العصابات وبعض الفاسدين ينتقلون من مكان إلى مكان بطائراتهم الخاصة وي الحماية والحراس، ومو بعيدة هاي الطيارة الهليكوبتر مال واحد من الفاسدين لو رئيس عصابة وي الحماية وطاحت بيهم، فالشغلة تايهة مع العلم عدنا وزارة دفاع مدومن عالراسين بالمركز والأقليم، الكل صاموت لاموت في غياب تام للمهنية على كل المستويات، وللعلم ياهو نلزمه – إذا نگدر نلزمه وما يعضنا – يگول آني خلصتكم من الدكتاتور، بس هو أشوي داس زايد وخلصنا من الدولة وخلص على الدولة همين، مشكلته كان متحمس والبريك ماكو… وهذولة من يدوسون مثل التشريب ما يتوقفون إلا والصينية هپ بياض.. ومثل ما تعرفون التعامل وي البلد مثل التعامل مع أي طبخة.. ومن هاي هواية نسمع الطبخة السياسية.
هسة نحول البوصلة إلى بريطانيا.. مديرة مدرسة تنتحر وتقتل نفسها لأن مدرستها نزل تصنيفها في النظام التعليمي البريطاني من مدرسة ممتازة إلى مدرسة غير ملائمة للدراسة.. أي وداعتكم.. هيچ تصير المهنية، ما قبلتْ على نفسها تكون مديرة فاشلة ولا قبلتْ تشوف المدرسة إللي هي مديرتها ينخفض تصنيفها، والجماعة إللي عدنا خفضوا تصنيف البلد من حالة الدولة إلى اللا دولة وبعدهم ذولاك هم، وفوگ الضيم يتوارثون العار لأولادهم وأبنائهم وبناتهم ونسبانهم من الزوجة الأولى و الثالثة مروراً بالثانية.. تم سحب صفة الدولة وحولوا البلد إلى سبيل مشاع أرضاً وماءً وسماءً وحتى تحت التراب والوجوه هي هي نفسها وجوه الچينكو إللي ما تستحي ولا تعرگ.
وعلى سالفة الهليكوبتر.. كم فاسد فلت بطيارته الخاصة؟ وكم فاسد عنده مهبط هليكوبترات في مزرعته الخاصة؟ وكم واحد خمط هليكوبترات لحسابه الخاص، أكو ناس تنسلگ أبهاتهم من الأزدحام بينما الفاسد يصعد بالهلكوبتر مالته ينتقل من مكان إلى مكان.. ونشكر العاصفة الرعدية إللي كشفتْ إلنا سقوط الهليكوبتر، لأن أكيد باليوم كذا رحلة هليكوبتر تعبر وتمر بدون حسيب ولا رقيب ما دام الجيب سالم ويكبر مع كل رحلة.
وخطية أهل الأنواء الجوية ونشرات الطقس اليومية لأن يجوز هم الوحيدين إللي ما ياخذون رشوة لأن الموضوع مو بيدهم، بس أبشرهم الخير جاي بالطريق ومثل ما سمعنا أكو خطة المطر الصناعي، يعني قريباً حتى المطر بالرشوة، تدفع أرسل لك غيمة تمطر على مزرعتك، لو أرسل لك غيمة سودة ورعدية توگع هليكوبتر خصمك.. وبكيفك تريد تنعرف الجثث مال منو لو لا.. كلشي وحسابه وتدلل.