شريف طايل
وأنا كل ما أكتبلك قصيدة
تختل موازين الكلام
والبحر يهرب غصب عني
نقطتين وفراغ جديد
من أول السطر إبتداء العشق
داء مالهوش دوا غير الحنين رغم التلاتين
اللي عدوا م السنين
تلقاك جنين عيل يشب ف حضنها
ويبوس جبين المعجزات يمسح أهاته
بكفها ويدوب هناك
بين الخطوط كل ابتسامة
وقت خوفك م المصارحة
بتبقى طارحة 4 حروف
العين تشوفهم من بعيد
يقراهم القلب الوطن
يبعت إشارة للدماغ
هي الوطن فتبيع همومك للسراب
تضحك أمل تزرع وتحصد بالكلام
فعلين جنون تتهجى كون
من غير بكا مين اشتكى ؟!!
لشوارع الثانوي اللي رجلك كانت تخطي ترجها و
تسيب على وش الرصيف بشلة وجع
وتهز جدران المدارس كلها
كات خطوتك خزنة سلاح متبعترة
ف كل الربوع متعمرة ديوانين نزار*
60 قصيدة لعم نجم*
و 100 حكاية عن الجنوبي *
ياريت تتوبي
وتفتري على كل أنصاف الكتابة
وتنصفي مين عاش
عبيط لجل القلم درويش*
بصحبة ابن رشد*
بيرقصوا تانجو البلاغة
على نشيد من حنجرة شيخنا إمام *
والعم زين*
عمال بيزرع ف المعاجم 100
مرادف للوطن يصرخ جاهين*
الفلسفة ( لو كنت عارف مين أنا ؟!! ) *
من كام سنة غنوة منير*
كانت بتسبق خطوتي
ب 20 أنا وحفظتها طبعا غلط
زي الجميع
وكتبتها على كل جدران الفصول
( نعناع الجنينة المسجي في حيضانه شجر الموز طرح ضلل على )*
حلمي فكتبتله مرسال
بعد التحية والسؤال عن صحتك
طمعان أنا ف محبتك ورضاك وبس
ومش هطول ف الشروح انت السبب
سبت الشتا عمال يدقدق ع البيبان*
ما فتحتلوش ما وهبتهوش
بذرة خضار من نبت روحك
تستمد البوح فتكتب 100 قصيدة
عن الوطن تاني الوطن !!!
كل أما تهرب يجبرك تنطق حروفه
بدون تجمل مش هكمل
باقي نصي عشان تعبت
من الحنين ومن الأنا علشان حلول المسألة
بتصب دايما ف الفراغ هامش جديد بره الدماغ الجخ*
ع المسرح بيلقي بالإشارة م الكالوس
( طبعا ما صلتش العشا )*
وأنا مش هصلي عشان تملي
سيرة العشق القديمة تنقض طهارتي والوضوء
محتاج لمية والمحابس مقفولين
سد نهضة وسين وجيم والنون
إضافي على الكلام مجبر أخاك
وما هوش جدع ولا مرة هب ف وش
مصر يسبها ويشدها من ضفايرها
اللي سابوا للجميع !!!
ف النشرة ذيع هذا الخبر
( شاعر جديد ..
باحث عن الشهرة العميقة
بيرتجل نصين حداثة على البسيط
وعشان حويط لابس تملي سلسلة
وبيستجيب للمادة أو للوجبة أو للصعلكة ..
شاعر جديد وطني أوي ..
واد فهلوي .
. لبلاب ف طبعه ومستقيم ف إيدينا لسه نوجهه
.. شاعر عظيم ومصر فعلا تشبهه) !!!
هوامش :
*نزار : نزار قباني ( شاعر سوري ) *نجم : أحمد فؤاد نجم ( شاعر مصري ) *الجنوبي : أمل دنقل ( شاعر مصري ) *درويش : محمود درويش ( شاعر فلسطيني ) *ابن رشد : فيلسوف ومفكر أندلسي *الشيخ إمام : مغني مصري *العم زين : زين العابدين فؤاد ( شاعر مصري ) *جاهين : صلاح جاهين ( شاعر مصري ) * لو كنت عارف مين أنا ؟!! : من رباعية لصلاح جاهين *منير : محمد منير ( مطرب مصري ) *نعناع الجنينة : أغنية من التراث النوبي *سبت الشتا عمال يدقدق ع البيبان : إشارة للشاعر / إبراهيم عبد الفتاح ( شاعر مصري ) *الجخ : هشام الجخ ( شاعر مصري ) *طبعا ما صلتش العشا : قصيدة لهشام الجخ شريف طايل مصر