برهان المفتي
……….
منطقتنا مو كلش راقية، بيها بيوت حلوة وبيوت على گد الحال بس مال واحد ينام ويگعد، بين البيوت أكو قطعة ما لها صاحب، هيچ يگولون، بس الحقيقة لها صاحب بس محد يريد يگول، ولا صاحب القطعة هسة بحالها.هاي القطعة صارت خرابة والكل يرمون زبل يومهم وأكلهم، ولأن هواية فترات ماكو ماي فاهل المنطقة حتى نوبات يرمون خراهم لو يخرون بهاي القطعة إللي صارت خرابة ومزبلة الكل مشارك بيها.
ومن الناس بمنطقتنا يسولفون تسمع الكل ضايجين من هاي الخرابة والريحة إللي تجي منها والجريدية والصراصر وشكو ماكو من الحشرات المقززة والضارة، الكل يلوم بالسر جاره القريب والبعيد لأن يرمي زبالته بهاي الخرابة المشتركة، ومع ذلك محد بيهم يتحرك يردم الخرابة لو يسيجها حتى لحد يرمي بيها، لو واحد بيهم يروح للبلدية يا جماعة تعالوا شوفوا الحل وي هاي الخرابة، لأن الكل مستفاد منها، لا تصدگ كلام الريحة الجايفة لو الجريدية، الكل متونس على خراب وازعاج جاره، نعم بمنطقتنا نتونس بالإزعاج وواحدنا يفتخر بكمية الإزعاج إللي يسببها لغيره.. هاي بعد طبع أهل المنطقة وما نگدر نغيره.
بس من چم يوم أكو حچاية أن صاحب القطعة توفى بالخارج وعنده ولد گام يدور بالدفاتر العتيگة وشاف هاي القطعة، وهسة يريد يجي ويشوف صرفة لو يبيعها خاصة أن القطعة چبيرة وراح يجيب خوش فلوس. أهل بيوت المنطقة هسة الكل مصخنين شلون راح يكون يومهم بلا هاي الخرابة إللي هي في تراث وفلوكلور المنطقة وأجيال عدهم ذكريات وياها، خو أكو واحد هسة طبيب چبير يتذكر أن أمه چانت ترمي حفايض الخرا مالته من چان طفل بهاي الخرابة، فهيچ ذكرى حلوة شلون راح تنلغي إذا يجي أبن المرحوم صاحب القطعة ويريد يبيعها.. وحتى بنات المنطقة عدهم ذكريات بيها لأن للكثير منهن اول بوسة بحياتهن چانت بالخرابة من راحت ترمي الزبل، بس هي بالحقيقة چانت مواعدة أبن الجيران بهيكل الپيكب القديم بزاوية بالخرابة.. بهيكل پيكب موديل شيفروليه موديل 1966 مال حجي لفتة إللي بعدين صار طگوك وشلون ما تدري، خليها سكتة لدرجة حجي لفتة عاف الپيكب بالخرابة للجهال.
هسة أهل المنطقة مسوين تحالف (الخرابة مصيرنا المشترك) والكل مسوين صفحات للدفاع عن بقاء الخرابة رغم أن الجريدية بالمنطقة صارت أكثر من الوادم إللي بيها، ورغم أن الصراصر نوبات تطفر فوگ التمن عبالك كشمش، وصارت كل أسبوع مهرجانات للشعر الشعبي عن أهمية هاي الخرابة في شخصية أهل المنطقة وذكرياتهم الجميلة، والكل واگفين متوحدين ضد الوريث الشرعي لهاي القطعة أو الخرابة، شلون يجي ويسلب الناس تاريخهم. فالكل مشتركون بالزبل والخراب.
ومثل ما تشوف مو كلشي تسمعه صحيح، الكل من يگعدون ضايجين من الريحة والمنظر، بس الحقيقة الكل معتزين ومتمسكين بهاي الخرابة لأن تمثلهم، تمثل يومهم وسنين عمرهم، وبعدين هي خرابتنا منا وبينا وحتى الجريدية صارن عرف ويانا، والشي المهم محد بمنطقتنا يعير الثاني لو يتنمر عليه عساس هو گاعد بصف خرابة، لأن الكل گاعدين بصفها فهي في مركز المنطقة والكل له بصمة وزبل بيها وحتى الخراء.
لذلك.. ندعو لبقاء الخرابة بما فيها ونحن نتحمل تبعات هذا البقاء، وهسة جاي نلم چم فلس حتى ننطي للوريث الشرعي بلكي يسكت ويرجع للبلاد البعيدة إللي دفن بيها أبوه… ويخلينا وي خرابتنا إللي راح نحرص على أن تبقى لولدنا وأحفادنا.. غيرنا يورث ملايين لولده وإحنا نورث خرابة لولدنا.. كل واحد وطبعه وحظه.. ومستمرون.