برهان المفتي
………….
أكو واحد طوله نص متر وأشوية، بعده ما متعلم يسوق سيارة، وما يعرف الفرق بين البنزين والديزل، والمدينة إللي هو يعيش بيها ماكو شارع براسه خير، كلها طسات وحفر من يوم إعلان شركة التأمين الخالد ” هوپ هوپ طفي گدامك الطسة”.. هذا الواحد صارت عنده فلوس وراد يشتريله هيبة، والفلوس كلها من النهيبة.. مو مشكلة حلالاً زلالاً.. المشكلة أن هذا الواحد قافل ويريد يشتري لامبورگيني آخر موديل والنوب كشف رغم الناس يگولون يمعود الكشف ما يفيد مدينتك إللي هي كلها طوز وعواصف ترابية والصيف بيها عشرة أشهر وإذا أستمر عرض الصيف بنجاح باهر وأكو عليه طلب يصير طنعش شهر بالسنة، فشلك بلامبورگيني كشف؟ وشوف النصيحة الناس ما يگولون أنت نص متر وإذا تريد رجلك توصل لدواسة البنزين لازم ما تشوف الشارغ وأذا تريد تشوف الشارع ما تگدر تسوق السيارة.. ولا يريدون يگولوله هو أنت من الأساس ما عندك إجازة ولا فايل بالمرور. المهم اللوگية والمنافقين والحبربشية إللي كلهم مستفادين من فلوس هذا الواحد محد يريد يگول له أنت بالأول لازم تدبر حل لموضوع الطول عندك، حتى تگدر تسوق وتشوف الشارع بنفس الوقت، شوف لو ينزلولك مقعد مال السيارة لو يكبرون الجامة لو يرفعولك الدواسة، هذا أولاً، وبعدين لازم تروح تفتح فايل بالمروروتتعلم السياقة ترى سياقة السيارة مو مثل سياقة البايسكل إللي الحجي الوالد كان يركب عليه وحتى مات عليه من ضربته لوري وطخ بالرصيف.. وموضوع شوارع المدينة شوفلها حل.. ترى اللامبورگيني سيارة كلش ناصية وتمشي عبالك لاطشة بالشارع وإذا أكو اي طسة ترى ما تمشي وفلوسك كلها تروح خسارة ولا تستفاد من هيبة اللامبورگيني ولا كشختها.
ويا ريت لو يروح ويشتري لامبورگيني إللي بباله من الشركة الأصلية بدون شركاء وسماسرة وعمولات، لا هذا گاعد يدور بمواقع الأنترنت وصفحات هواة السيارات وأصحاب المعارض، وإصحاب معارض السيارات يعرفون هذا الواحد ما عنده خبرة بالسيارات ولا بأسعارها فكل يوم مطلعين موديل وسعر جديد وهو فرحان راح يشتري لامبورگيني محد عنده منها، والنوب أهل المعارض يجيبون شي على شي بحيث السيارة تطلع لا هي لامبورگيني ولا هي فيراري ولا هي ماكلارين ولا بوگاتي وأكثر شي يشبه السايبا بس هو مقتنع أن هاي هي اللامبورگيني إللي راح يكشخ بيها.
وراح يشتري اللامبورگيني ويدفع بيها خوش دولارات والنوب إللي يبيعله لا عنده علاقة بعالم السيارات ولا بمعارض السيارات، يطلع واحد ما يعرف بس بشعار الثورة والحزب، ومو مهم يا ثورة ويا حزب لأن الكل نفس الفلم وداعتك ،واحد تافل بحلگ اللاخ ببركة صاحب الدكان إللي حاطهم كلهم بالمخزن عنده،ويطلعهم واحد واحد بحسب الحاجة بالسوگ، وراح تصير السيارة كلشي ما نستفاد منها وراح نترحم على أيام أريل السيارة إللي باعوه عساس جهاز كشف المتفجرات.. ومو بعيد راح يجيبون زمال ويصبغوه ويلزگون بگصته شعار اللامبورگيني ويخلوه على تايرات ويدحسون بالشيسمون مال الزمال صالنصة مال لامبورگيني ويگولون لهذا الواحد جبنالك لامبورگيني وما معلوب بمحركها في تحوير تاريخي للأهزوجة العراقية الخاصة للكبار ( جبالنلك برنو ما ملعوب بسورگيها) وإللي تلحگها النصيحة الفلسفية الخالدة (شارعنا ضيق لا تفوت بسوپرك) إلا بعد ما تدير سطلة فازالين بالشارع حتى السوپر بالحجم الرويال يفوت بدون مشاكل.. ولو حلاوة سياقة السوپر يدخل بشارع ضيق ويطخ يمنة .. بس جيب إللي يفتهم بالسياقة ومو مثل هذا الواحد إللي راح يبيعوله زمال عساس لامبورگيني آخر موديل.. وما راح يعرف إلا من يگعد ومن يريد يتفاخر والنوس يوشوفوه راكب لامبورگيني يخلي أيده عالهورن وراح يسمع نهيق ففزع من في البيوت والشوارع.
المهم هيبة فوگ زمال ماركة لامبورگيني.