دالغة – برهان المفتي – ألف ياء
دعوة للفسابكة العراقيين أن يستخدموا الفيسبوك لأحداث تغيير وليس فقط نلعن الفساد وحظنا
العراقي من أكثر شعوب العالم في استخدام الفيسبوك، وبفشل كبير جداً، لأن العراقي ما نجح في إيصال صوته من المشاكل إللي يعاني منها بسبب الفساد والمحاصصة والدستور الملغم إلى العالم، بعكس السوري إللي نجح وبشكل مبهر ومدهش في جعل النزوح السوري مشكلة عالمية، ونجح في تغيير سلوك المجتمعات حتى تتقبل النازحين واللاجئين السوريين وبعدين صاروا هم إللي يتحكمون بالدول إللي نزحوا لها. هذا نجاح كان المفروض العراقي وكليات الأجتماع العراقية تاخذها وتدرسها حتى تستفاد من هذا النموذج.
صفحات الفسابكة العراقية معظمها نكات وصور صينية دولمة لو طماطة مقلية لو تكة شيلمان لو لفة فلافل تنزل من أطرافها العمبة لو سؤال ميتافيزيقي في الميثولوجيا مثل شنو الأصح نگول تشريب بامية لو تشريب بانية؟ لو هي الخاشوگة نترجمها ملعقة لو معلقة، لا وتعال ليش نگول نعلة وما نگول لعنة !! والسؤال الأهم ليش لازم رقم سطعش من نسب واحد بكلب أبن سطعش كلب؟؟ شنو دلالة هذا الرقم الغامض هنا بهاي الشتيمة!
وبين هاي الصفحات أكو صفحات من تدخللها لو تطلع لك هي من حيث لا تحتسب لازم تعقم الماوس والكيبورد لأن صفحات مليانة قذارة وصايرة منتجع فايف ستار للذباب، ذباب هاي الصفحات تتغذى على خراء السياسيين، صفحات تحتاج تمسح شاشة الكمبيوتر لو الموبايل بشاش معقم من تظهر گدامك بسبب الصور إللي بيها.
وأكو صفحات هي مخصصة لمنطقة معينة بمدينة عراقية، وتعال شوف عنصرية أهالي هاي المنطقة ضد باقي مناطق نفس المدينة، وهي نتيجة متوقعة إذا يفوز بالإنتخابات واحد كان شايل شعار مناطقي أن هو راح يشتغل فقط لمنطقته، والغريب أن هاي المنطقة لو تجيها بالطول والعرض ومن فوگ وجوة ما يطلع بيها خمسين ألف شخص، مع ذلك هذا الشخص فاز بعدد أصوات بحيث ذاك هو نايب بالپرلمان العراقي، يعني هو كل شغلة المحافظة على السيان المار بدربونتهم باعتباره سيان تراثي متوارث من أيام جد جده الملعون السادس عشر.
لو صفحات قومية عنصرية مليانة شعارات قومية إللي ضيعتنا وطشرتنا طشارة وخلتنا كل واحد جوة نجمة، وحتى صفحات عشائرية مثل صفحة محبي الشيخ فلتان الفسو ونخوتها أخو ضرطة. ويا ريت لو الذباب بهاي الصفحات تبقى بيها، لا هي تنطلق محملة بقذارتها حتى توصخ چم صفحة نظيفة تحاول وتصر على أن تستخدم الفيسبوك لفضح الفساد والرشاوى والمحسوبيات وكارثة المحاصصة وتحاول زرع بذور المواطَنة وبناء دولة مدنية، ويا للأسى هسة جايين نحاول نبني والآخرين خلصوا البناء قاط وقاطين وبنايات وعمارات وإحنا بعدنا نحاول نبني، وما متفقين على الموديل، لا ونتعارك على لون صبغ الحايط وبعدنا ما مختارين الگاع ونوع البناء.
الفيسبوك سلاح مهم، وأكو دول غيرت أنظمتها من خلال الفيسبوك لو من خلال منشور واحد أو أكسية وحدة (أيام چنا نگول تغريدة وحدة بس هسة ماكو تغريدة كلها أكس)، دعوة للفسابكة العراقيين أستخدموا الفيسبوك لأحداث تغيير ومو نگعد نلعن حظنا ونلعن الفساد وإحنا بيدنا وبصفحتنا نگدر نغير هذا الواقع المخزي.. الدولمة بالعافية عليكم وتشريب الباگلة بالعافية، وباچر بعد ما نبني بلد عود راح نشوف مادة دستورية نحل بيها الموضوع إللي مختلفين عليه بكل طوافنا وعشايرنا وقومياتنا وهو : ياهو الأصح نگول نريد كيلو ترعوزي لو تعروزي لو عطروزي… ولو الكل بالأخير ياكلوه إذا بالزلاطة لو بالطرشي لو بنكهة الفازالين.