برهان المفتي
الوهم مصيبة، وإحنا من سنين طويلة داخلين في حالة وهم، وهاي الحالة تخلي الواحد ما مرتبط بالواقع وتصير طيرة أفيالة بفلس لدرجة ما نتعجب نفتح الشباك الصبح ونشوف فيّولة زغيرة وردية واگفة على غصن الشجرة بالحديقة الوارفة وتغرد وتگول ” دنيا حلوة وناس حلوة والوطن باسم سعيد”.
ومن يصير ماكو الواقع يكون إستدعاء الماضي وجعله بالونات نفخ للمستقبل، وهذا يخلي الموهوم ما يتصرف التصرفات الصحيحة مع مشاكله الحالية لأن المشاكل الحالية في الواقع والموهوم ما عنده واقع.
من أسمع الأخبار وأقرا سبتايتلات الفضايات العراقية إللي تطبل لهذا وذاك لو هاي الكتلة المستفادة من الحصة وذيچ أعرف مستوى الوهم إللي مسيطر على الخطابات اللي تنشرها هاي الفضائيات وحتى الوهم في الخطابات الرسمية وتصريحات المسؤولين العراقيين إللي هم كلهم داخلين الحملة الوطنية الشاملة للشط مرگ والزور خواشيگ، وعلى هاي الرنة من عشرين سنة، من سالفة تصدير الكهرباء بالسطولة ببراءة إختراع للعالم الكهربستاني، وحتى تصريح أبو الكهرباء بشهر نيسان هالسنة 2023 أن هاي السنة ماكو مشكلة الكهرباء وتالي نفس الصماخ طلع وگال محطات توليد الكهرباء صارت طابوگة وماكو توليد.
ويطلع إلنا ما أعرف منو وبراس مربع وجه وگفة ويگول عرفنا المشكلة الحقيقية للكهرباء !! هسة يللا.. رغم أن الكهرباء بلعت من الأموال العراقية مليارات أكثر من أي جهة أخرى بكيفك بالضمة لو بالفتحة على الهمزة لأن نفس الحال وماكو فرق.
هذولة الواهمين ما عايشين مشاكل الواقع ولا يسمعون ونات الواقع وآهات الناس.. الوهم يخلي حاجز بينهم وبين الآخرين، تماماً مثل الامبراكور العاري إللي اوهموه أنه لابس أفخر نوع قماش رقيق لدرة ما ينشاف، وهسة مو أمبراطور واحد، كل مسؤول يتصرف تصرفات امبرارطور بأسطول الحماية والسيارات والمستشارين، هذول المستشارين شغلهم البحث عن أفخر أنواع قماش من الوهم ويلبسوه المسؤول لو الوزير ويگولوله طالع فلة وتخبل شنو هالكشخة والهيبة والحضور.. فوت بيها وعالزلم خليها مثل جماعة ذاك الموهوم إللي كل هاي الفوضى من زرعه الفاسد وشعارات الوهم إللي عاش بيها .
وما تصير إلنا چارة ولا حل إذا ما نلگي الواقع حتى نوگف عليه ونعرف الأرضية، ثابتة لو رمال متحركة، وشنو إمكانياتنا، وشگد نگدر نشمر خطوتنا.. القفز يرادله لياقة عالية وهاي البلاد مكرشة من سنوات بسبب الكسل والعطلات وماكو اي لياقة لأي قفزة.. بلاد مريضة وماكو حيل للقفزة.
أتركوا الوهم وخطابات الوهم، خاطبوا الناس بما موجود عالواقع، كافي خداع وشعارات غير واقعية، شبعنا مرگة الشط وأنكسرت الخواشيگ، وأي تصريح ترى يظل بذاكرة الناس واليوتيوب ما يقصر والله يحفظه ذخر للحقيقة وكشف الفاسدين وخلونا نترك إستدعاء الماضي، أدوات الحاضر مو نفس أدوات ولا ظروف الماضي، نزعوا عباية الماضي المليانة زخارف من الوهم، هاي العباية ما تناسب لا الحركة ولا الحضور إذا نريد نروح لباچر وبعد باچر، وإذا تصرون على لبس هاي العباية ترى مو بعيدة الشمس اللاهبة تحرگ العباية والوهم ويخليكم بالواقع.. هذا إذا الشمس خلت إلكم أرضية واقع توگفون عليها وما حرگت الگاع وما عليها من الموهومين الفاسدين… وأنتو بكيفكم !