دالغة هيا بنا نلطم

عقد لشركة #نور_زهير بقيمة 22 مليار دولار دالغة- حَب جگاير علج ………. شنو سعر القطار؟ وشلون ينباع بالمتر مثل القماش لو بالوزن مثل الگيمر؟ وإذا واحد يشتريه شلون يشيله ويجيبه؟ هو مو شغلة صمون يروح بالبايسكل ويدفع ألف دينار وطول الطريق يطوط بالطواطة فرحان وهو يعلس گمع الصمونة. نور زهير عنده شركة إختصاصها شراء قطارات ونقلها ونصبها بحسب كتاب رسمي وبحسب عقود سكك الحديد وشراء القطارات.. هسة إحنا لا بنگلادش ولا الهند ولا مصر ولا جنوب أفريقيا حتى تصير عدنا سكك حديد بألاف الكيلومترات طول وعرض البلاد.. لعد شلون أقتنع هذا النچر بأن شراء القطارات يجيب خوش فلوس لجيبه؟ هذا الكتاب هو دليل إدانة للي سجّل هاي الشركة ونطاها إجازة أستيراد، لأن عالمياً معروفين كم شركة مختصة في صناعة القطارات وفي نقلها ونصبها.. نور زهير منين تعلم هاي الصنعة؟ منين لك هذه الكلاوات؟ وبعدين كم شركة بالعراق مختصة بشراء ونقل ونصب القطارات؟ ماكو مو؟ إذن كل عقود المناقصات راح تكون من نصيب شركة نور زهير وهذا إحتكار، وقانوناً ما تصير بس شركة وحدة تقدم عطاءات للمناقصة بأي عقد وفي أي مكان بالعالم.. بالأقل لازم ثلاثة علمود المنافسة. أبو تسجيل الشركات شلون أقتنع أن نور زهير متمكن في تجارة القطارات؟ كم قطار مشتري قبل؟ وين تعلم ووين كان يطلع تراي بالقطار؟ يعني ما أستغرب راح نشوف كتاب وشركة مختصة بنقل ونصب جبال جليدية من القطب الشمالي حتى نبرّد الجو بصيف العراق حتى لا كهرباء ولا راحت الوطنية واحترگت جوزة المولدة ، الشغلة بسيطة أبو تسجيل الشركات موجود، نشوفه ترمس مليان ثلج كدليل خبرتنا بكسر ونقل الثلج ويسجل الشركة. الكلاوات بالعراق فول أوپشن.. شتريد موجود.. ومو بعيد شركة مختصة بتجارة التين بس بالحقيقة تبيعلنا تبن… فرق نقطة بالكتابة.. بس ربح مليار لجيب أبو الشركة إللي يضحك علينا وإحنا ناكل تبن. ………….