دالغة-تحديث البيانات
برهان المفتي
………
الدول تنطي أسماء شوارعها وجسورها لمبدعيها، ونوبات لأصدقائها إذا كان هذا الصديق قام بعمل أو مساعدة غيرت حال البلد سواء في السلم أو الحرب. وإعطاء أسم شخص على الشوارع أو الجسور أو حتى المدارس لو المستشفيات هي دليل على تفرد صاحب الأسم في عمل متميز مو كل واحد يگدر يسويه.
ومن سنوات.. عدنا بالعراق متميزين يستحقون أساميهم تنطي للشوارع لو للجسور، ومن سنوات أكثر شي متميز بالعراق هو الفساد، وأكثر المبدعين في العراق منذ سنوات هم إللي عدهم أفكار إبداعية في أبتكار أساليب فساد ماكو منها بأي بلد آخر.. نحن متميزون بهذا الجانب وليس لدينا فرع آخر في أي مكان.
ليش ما نسوي حي (نور زهير) وهو يستحق تكون بأسمه دولة مو حي، بس العافية درجات.. نور زهير أشترى منطقة كاملة بنص بغداد وما نريد نجيب أسم المنطقة حتى الناس إللي بيها ما يتفاجئون، هاي المنطقة تستحق نسميها حي (نور زهير)، وراح تشوفون شلون راح تنزل على الناس بهاي المنطقة بركات كلشي وكلاشي مثل ما صابت البركة نور زهير والتراب إللي جوه قندرته صار ذهب، وحتى هو طلعتله جناحات طار بيهن، والنوب حتى چهرته تغيرت ومحد يعرفه.
نحتاج إلى البدء بحملة إطلاق أسماء الفاسدين المتميزين والمبدعين بطرق حيلهم وسرقاتهم على الشوراع في بغداد والمحافظات، بهاي الطريقة ما ننساهم، وباچر لو بعد من ولدنا يكبرون ويسألون عن هذه الأسماء نخبرهم عن قصص هذول الفاسدين وشلون غيروا حال البلد بفسادهم .
وين ما نمشي في أي منطقة ببغداد لو بالمحافظات نشوف الفاسدين حاضرين بأموالهم، مناطق كاملة للفاسدين لدرجة صارت بيها قوانينهم الخاصة وعادات تلك المناطق هي عادادت هذا الفاسد لو تلك الفاسدة، لأن مثل ما يگولون الناس على دين ملوكهم، عطلة هاي المناطق مو وي الدولة بل وي مزاج الفاسد إللي مسيطر على هاي المنطقة بقوة المال لو المليشيات إللي يصرف عليها من مال الفساد، هاي المناطق تستحق تشيل أسم الفاسد المسيطر عليها وخليها تصير من مسؤوليته تماما، يصرف على الناس إللي بيها ويعينهم ويعالجهم، لأن شايلين أسمه، بهاي الطريقة نستفاد من الفساد والفاسدين، لأن مثل ما گلنا الفساد صار طبع بالمجتمع العراقي وماكو چارة ولا حل، واحسن شي التعايش وي الفساد، وهاي طريقة التعايش والكل يستفادون والوطن باسم سعيد، المهم النتيجة مو شلون صارت النتيجة وشلون توصلنا للنتيجة!
أسماء المحلات ببغداد صارت قديمة وما تناسب التغييرات إللي صارت بيها، أسماء المناطق الرسمية ببغداد والمحافظات هسة حتى سواق التاكسي تسميها بغير أسماء،كل المناطق دلالاتها أختلفت شعبياً بلسان الناس بحسب الفلان الفلاني إللي مسيطر على مداخل ومخارج هاي االشوارع والأسواق والمناطق، وتتذكرون بيت أبو الطيارة شلون المنطقة كلها صارت أسمها يم بيت أبو الطيارة، هسة عدنا مناطق ببغداد يم قصر الفاسد الفلاني، هاي المناطق صارت تنعرف بأسماء فاسديها، يعني شعبياً الناس تصرفت أحسن من الدولة بأطلاق أسماء الفاسدين على شوارع المدن والمناطق إللي مسيطر عليها الفاسدين، بس باقية خطوة رسمية من الدولة حتى نعرف راسنا من رجلينا، ولازم نسوي تحديث للبيانات في خرائط الگوگول وتعميم للسفارات علمود الناس إللي بالخارج من سنوات، لأن هذول من يرجعون أو عدهم زيارة لأي سبب عبالهم البلد والشوارع هي نفسها، فيا جماعة الخارج ترى للعلم إذا أي واحد منكم يرجع علمود صحة صدور لو الهوية الوطنية إذا تاخذون تاكسي من المطار وتگولون بلا زحمة للداوودي.. ترى السايق راح يصفن على چهرتك ويدردم ويگول: حييييييل شگد عتيگ!